IK PERIPE, YA TSITSØ UTU WARAP TATAMERAN MAMAMERAN KUCHA PULELEY PALLCHAK YAU SRØM TØKATØ PØRIK WARØNTRAI PØRIKKØN


Trek purømisøpik: Tutelakøn
Trek køntreincha pøra werik utøpø: (pøn pøl tratrø kualømyu pørikøn 2020)
Kilka pasrøpik: nu pachik chak tata mera
Kilka pasriknapelø: Ministerio del Interior- Dirección de Asuntos Indígenas, Rrom y minorías.
Purøløtampurukupik LUIS ALBERTO ÁLVAREZ PARRA

 

Trupurap pørielø:

 

Consejo de Estadope pa tratrø kualømeratø utø tranin kuinkøn Dirección de Asuntos Indígenas, Rrom y Minorías del Ministerio del Interior yuelan, tru mɵy kualɵm wareinpiraupe namuy metarp kɵllimisak meray chitɵ kuitashchap paya kusrewa mɵra wam trantrap aship kɵn, yu Nu Pachik Chak srɵmpe, mɵy ɵyasrɵmpe tratrɵ trull pilamerakɵn misrik kuin kɵn,  trek kutri ya tsitsø utu warap tatameran mamameran kucha puleley pallchak yau srøm tøkatø pørik warøntrai pørikkøn.

 

Ikpurappe, ke pɵlpasrá aship mentappe Tribunal Administrativo del Valle wam tranik kuin kɵn nɵm purɵmisrɵp Nu Pachik Chakmisakmerape , tratrɵ pilakɵn kuin kɵn tru Dirección de Asuntos Indígenas, Rrom y Minorías del Ministerio del Interior nɵmún kucha pɵra warsracha incha, misak mera kucha mampatɵ kuikwan. Mara purɵrentɵ, Dirección de Asuntos Indígenasyu kutrimpe kekɵ letɵmuykɵpikkuin, incha kutri pa trutɵ utɵ traninkɵn,  nɵmuy purap chinetɵ maramelan martrai. Tru pirau kucha namuy misameray srɵlmera kena kɵtashcheympa.

 

Yantɵ Consejo de Estadoyu kutri purɵ lɵtapɵ,  tru Ministeriope tappe marsrap asielan chi kutrintɵ kaimailan eshkap purayeik kepik kuinkɵn,  tru kɵmnetɵ sreitɵ lutɵ maramelɵ we kalaillan pa aship kuin kɵn; incha wetɵkɵtrappa ya tsistɵ utu warapelainpe mantɵtɵ mará pɵra warampurap  chi pɵra warik kakuik asin kɵn. Trek wan kekɵmaramikpe, tru maya misakmera trentɵ kan sɵtɵtɵ tul ampɵp amtrui misha stiku Mesa Permanente de Concertación con los Pueblos y Organizaciones Indígenas teinuk tewey tap wam wepatrunteik pasran.

 

Tru Direcciónyu kutrimpe, kan pila kualɵmyupe yantɵ Plan Nacional de Desarrollo yupe, chapkɵn 25 de mayo del 2019 kutri asha tamara kerɵp kuinkɵ, chinchakopen pastɵkɵntrap isua, incha yantɵ chap pɵra tratrik ministerioyu pɵrik stumisrtrei. Ya stistɵ utu tatameran mamameran trek kɵntreincha para warik kakuinkucha.

 

CONSEJO DE ESTADOY WAMPE:

Consejo de Estadope yanto kan wamtɵ isua pɵra wera tranik kɵn, tru pa mai pɵra werinukpe  trenyipik kɵn: yatsistɵ utu misak warapelain purappe pallyakyu kutri ashcheinkɵn, tsalɵintinap kɵmɵntrai srɵsrɵpe namuy pirɵmerayukutri wepusrielɵ incha sɵnta sentape pirameran chap ketrailɵ mupa kɵpentɵ amɵñape amoñintraintɵ trenkɵmuppe pinentrey. Trukutri, tap purɵmisramik palappe nampe yuelɵ ker teik wan, ik pirau kaalawarker teinuk kutri Nu Pachik Chak Misakmeraimpurap pɵrik kɵn.

 

Ik pɵriknupe, ik pila 25 de mayo2020weype, yantɵ tru Dirección de Asuntos Indígenas, Rrom y Minorías del Ministerio del Interior kutri utɵ tranik patsantan; trek kutri yantɵ mantɵtɵ misak mereimpurap tap tap misak wan muncha asha pɵra waramikwan tamaramelo kɵn. Inchen ik utɵ pupen, katokucha keke maramelan marmuykuisruantɵpe, tatamerape sreitɵ purɵ misrɵp kilkamera pɵra keramelɵ kɵn. (tutelantes).


CRÉDITOS TEXTO
Marleny Deli Yalanda C. - Mutauta Kaá Asik Muelas Trochez
CRÉDITOS AUDIO
Marleny Deli Yalanda C.