KAMËNTSÁ



Consejo de estado wabainokan kmotsatachewaná ntŝam iwabain pagina web soy, ndayentŝ jobuinÿenam nday soy kmojtsëjabotká jtsetatŝëmbuam.

Kachká fsëntseboŝ janÿanÿeyam mokna yentŝang smënana, nday soy suenangmenana y ndayentŝ janÿenama justicia wabainoka.

Colombia waman luwar justiciekuent endëbomna unga soy jtsatëbëwanÿam yentŝangbioy.

Corte constitucional wabinësoy bondontŝabuach jobouyanam constitución politic wabainësoy, corte suprema de justicia wabainësoy echanjuabonÿ ntŝam betsemnayana, enajenayana y mand betsebomnana entre yentŝang, jtserrespetanan normënga y consejo de estado wabainësoy endëbomna uta soy jtsenangmenana:

  1. Jtsabuayeynayana kem bëts luwar utabná y ministrëng nderad tmojtsonamana ntŝam jakorrentiana normëng wabainësoy.

  2. Jtsabuajënÿan utabnëng: polosiang, soldad wabeinënga, corporación autónoma wabainënga, tkojonÿná jasentamoka, chamotsocumplinam ntŝam yoyentŝbuachëká.

  • slide
  • slide
  • slide
  • slide
  • slide
  • slide
  • slide
  • slide

Consejo de estado wabainësoy bondontŝabuach jayanan tŝabá o ndoñ tŝabá betsenangmena ndá tomna ngobiernëkuent. Chë natsan sënjabay soy modëmën unga bnëtsan magistradënga, kantang mondëmën president wabainá jtsebuayeynayama y kachká ministrëngnak. Chentŝana de una bnëtsan magistradëngna mondëmën jayanan ntŝam betseobrayana.

Chë consejo de estado chaobená jakorrentiam nday soy tbojtsëjabotká jontŝabuachana juapormana ndemandëchá o tutel wabainësoy, acción popular wabainësoy y kemësoyëngn opresido jtsemnana chë obuawauyayëng chabëjabuachama.

Consejo de estado endëmëna nÿetská yentŝangbe opresidama y endëmëna regla wabainësoy mokna palabr jakorrentiama y nderadosn ndëmua juez jontŝabuachana chawatskorrentema.

Kem consejo de estado tojanayana kabëngbiama jobuauyanama y jobouyanama ntŝam imoyenká, fshant, juabna y inÿe soyënga. Chamna endoyentŝbuach janotisiana mand atŝetanëngbioy, o inÿeng nderad muenangmena bëts cargotema congres wabainoká.

Ak kachká kmondoÿen consejo de estado wabainoy jotsanana nderad ndëmuá juabna o nday soy kojtseboŝ chakmuajabuch jakorrentiama. Ntŝam opresidëká endopodena janotisiana pagina web wabainësoyiñe. Kemuiñe sempre kochanjobuiÿen nday soy jtsetatŝëmbuama.

CRÉDITOS TEXTO
Institución Educativa Rural Bilingüe Artesanal Kamëntsá.
CRÉDITOS AUDIO
Shirley Alexandra Jacanamijoy Jacanamejoy, Alto Putumayo, comunidad Kamëntsá Biya, Municipio de Sibundoy.
CRÉDITOS FOTOS
Prensa Consejo de Estado